Soni dhe Flori: Bashkë jemi mirë edhe në një kasolle

Për herë të parë Soni Malaj dhe Florian Mumajesi flasin së bashku për historinë e tyre të dashurisë dhe një këngë që do të këndojnë në duet

Ajo e mban për krahu. Ka një vështrim paksa të shqetësuar. Të veshur sportivë. Preferojnë të ulen brenda. Njerëzit janë tepër kuriozë, kur bëher fjalë për personazhe publikë, aq më tepër kur intervistohen. Veçse ata nuk kanë asnjë droje kur flasin për njëri-tjetrin dhe i japin notën 10 dashurisë së tyre. Soni Malaj dhe Florian Mumajesi përmenden gjithandej si çifti i momentit. Nuk e kanë mohuar asnjëherë që kanë një histori dashurie, por tani preferojnë ta bëjnë edhe më publike këtë deklaratë. Bashkë në një duet që quhet "Fluturimi 3470". Një këngë R&B and soul. Një duet ndryshe nga ata klasikë me finale madhështore. Një bashkëpunim që lindi gjatë punës në studio. Më shumë një shkëmbim idesh. "Nuk mund t'i thuash jo së bukurës", - thotë Flori. Pjesë e dukshme e tregut muzikor shqiptar, Mumajesi dhe Malaj japin mendimin e tyre për zhvillimet e fundit muzikore, për muzikën e vërtetë, atë që dëgjohet me sy mbyllur, për piraterinë dhe të qënurit i pasur me xhepa bosh. Nuk ngurojnë tu përgjigjen pyetjeve edhe për veten e për njëri-tjetrit. "Bashkë jemi mirë edhe në një kasolle", - thotë Flori. Pas një shprehjeje të tillë, ajo nuk mund t'ia kursejë një të puthur.

Çfarë është fluturimi 3470?

Flori: Nuk është një numër domethënës. Është seria e një fluturimi, e një bilete. Një numër që më erdhi në mendje. Një avion që ulet në një aeroport, nga ku nuk zbret njeriu i zemrës. Unë e kërkoj, ajo nuk është. Është një këngë që më ka buruar dhe si e tillë shpresoj të jetë diçka e mirë, shpirtërore dhe e vërtetë.

Soni: Është një fluturim i këndshëm. Rikthehem në pistën e "Këngës Magjike" dhe shpresoj që kënga të pëlqehet, të arrijmë të përcjellim atë emocion me të cilin e kemi kënduar. Por emocioni më i madh është që dal në skenë me Florin. Është një ngjarje shumë e veçantë. Dhe tani unë po përjetoj pikërisht këtë emocion. Kam realizuar një këngë me Florin, një këngë të bukur që unë e ndiej. Nuk ka qenë pikësynim festivali, as çmimi. Nuk e kisha ndër mend të merrja pjesë në festival. Isha entuziazte që Flori po merrte pjesë me një këngë të bukur, madje isha e lumtur. Por kur m'u dha rasti të jem pjesë e këngës, kjo ishte gjëja më e bukur. Sa herë e dëgjoj emocionohem dhe është bukur që këtë ndjesi ta ndash me njeriun më të afërt.

Jeni të dashuruar dhe që në duetin e parë i këndoni një ndarjeje?!

Soni&.Flori: Nuk është ndarje. Nuk ia kushtojmë këngën njëri-tjetrit.

Flori: Jemi të emocionuar që këndojmë bashkë, por nuk e kishim menduar më parë. Nuk duam të abuzojmë me dashurinë tonë dhe me faktin që jemi bashkë. Kur teksti i këngës u krijua, u mbështetet në një dashuri që kushdo mund ta jetojë. I këndojmë dashurisë. Kënga ka shumë ngjarje. Ti nuk e sheh por e krijon me mendjen tënde imazhin.

Po do ketë një duet, me një këngë kushtuar historisë suaj?

Flori: Kemi bërë plot këngë për njëri-tjetrin. Momentalisht unë po punoj me Sonin, kështu që këto krijime kanë shumë dashuri.

Soni: Gjërat e bukura nuk programohen. Ato dalin vetiu. Nëse nisesh për të bërë diçka të bukur, ndoshta ajo nuk vjen kurrë. Kur gjithçka është organike, edhe emocioni ndihet nga dëgjuesi.

Pra ekziston mundësia që të ndjesh një këngë pa parë një videoklip?

Flori: Me këtë këngë po. Që kur u brumos mund të imagjinoje qindra këmbë që zbresin shkallët dhe ti nuk sheh njeriun e dashur.

Soni: Kur kënga ka një videoklip, atëherë ajo është më e plotë, por ne mund të japim rastin e këngës "Me sy mbyllur", apo "Ndarja", që nuk u shoqëruan me klipe, por u bënë hite. Kur një këngë është e bukur dhe ka emocionin brenda…

Por duket se sot shitet më shumë imazhi.

Flori: Jam pak skeptik në këtë pikë. Nuk mendoj se ato shiten, ato hyjnë në treg. Tek CD-të që blihen nuk janë ato. Nëse një femër është e bukur, ajo nuk dëgjohet, ajo shikohet. Nuk ka vlera artistike. Dhe mendoj se njerëzit po velen nga kjo.

Soni: Ne kemi edhe këngëtare të bukura që janë edhe të mira, por mendoj se të qenurit një sekssimbol ka dalë nga moda. Publiku bën zgjedhjen e vet. Një këngë pa vlera nuk mund të jetë refreni i një dite, të të gjendet në një moment të trishtë.

Flori: Nuk mund të mbyllësh sytë e ta shohësh, apo të udhëtosh natën e ta dëgjosh në makinë. Jo, nuk ndodh.

Si i shihni zhvillimet në tregun muzikor shqiptar?

Flori: Kohëve të fundit pak këngë me vlera janë krijuar. Këngëtarët shohin edhe pjesën e biznesit. Në shesh, ku këndohen këngë ritmike, nuk mund të dalësh me një baladë, sepse masa nuk ta kupton. Influencohen nga shijet e publikut, që duhet thënë janë të çuditshme. Kështu ndodh që nuk bën dot atë që do.

Soni: Në përmirësimin e kësaj situate rol duhet të luajnë edhe festivalet. Marrim "Këngën Magjike", që vitet e fundit, duke parë gjithë këtë gjullurdi në treg, po përpiqet të sjellë vlera.

Flori: Është një mundësi për të bërë atë që do, që ndjen, pa menduar në do të ngrihet në këmbë publiku, apo jo.

Bëhesh i pasur me këngën? Si ju rezulton në llogarinë bankare?

Flori: Shpirtërisht vetëm. E ndiej veten të pasur kur bëj muzikë, madje njeriun më fatlum në botë, por ekonomisht jo. E kam filluar me një llogari zero dhe vazhdon të jetë zero. Nuk mund të abuzohet me diçka që del nga shpirti.

Soni: Muzika është diçka shumë emocionale, shpirtërore. Florit i ndodh të zgjohet edhe në 02.00 të natës për të hedhur një motiv që i ka lindur në mendje. Ne e përjetojmë muzikën, sepse është një dashuri e madhe që kërkon përkushtim. Dhe si të tillë, zor se bëhemi të pasur, pasi edhe kompromiset nuk i pranojmë lehtë.

Si e shpjegoni atëherë fenomenin e plagjiaturës, apo "vjedhjes" së muzikës?

Soni: Mendoj se është një fenomen në zvogëlim. Para disa vitesh ishte shumë i përhapur, sepse edhe kompozitorët nuk dinin si të silleshin. Vinin nga festivalet me këngët e mëdha, ndërkohë që tregu ndryshoi dhe kompozitorët ishin konfuzë. Edhe mua më ka ndodhur në albumin e parë.

Si qëndron e vërteta e këngës suaj "të vjedhur" nga kënga serbe fituese e Eurovizionit, mos ndoshta u "fry" ca si tepër kjo çështje?

Soni: "Fryrja" nuk erdhi nga ne, por nga Suedia e Danimarka. Nuk mendoj se shqiptarët janë të parët që mbrojnë punën dhe artin e tyre, përkundrazi. Në atë periudhë më ndodhi, që shumë vende të Evropës më mbronin, ndërsa në Shqipëri u ngritën artistët (ndoshta nga xhelozia) të mbronin Serbinë. Këtu ishte edhe kontradikta. Mendoj se kjo histori ndihmoi të evidentohej kënga shqiptare. Kështu që duhej marrë në sensin pozitiv. Unë nuk e mora si një çështje personale. Ka këngë të tjera shqiptare që janë marrë nga vendet fqinje dhe ne nuk kemi guxuar të ngremë zërin.

Pra ju i qëndroni idesë se kënga serbe është e vjedhur?

S'mund të them e vjedhur. Po ka ngjashmëri, ndoshta për faktin që është baladë. Ka ngjashmëri në mënyrën e të kënduarit, zërit ndoshta.

Meqënëse jemi tek Eurovizioni, e mendoni pjesëmarrjen në Festivalin e fundvitit, me qëllimin për të shkuar në atë Evropian?

Soni: Nuk e shohim festivalin e fundvitit si trampolinë për në Eurovizion. Festivali i madh i ka zhgënjyer shumë artistët. Nuk arriti t'i mbante afër. Këngëtarët dhe kompozitorët e mirë nuk e shohin më si diçka ndjellëse për të shkuar në Eurovizion. Flori: Jemi shumë më të interesuar të sjellim diçka të bukur që të na pëlqejë ne dhe publikut. Edhe Eurovizioni vet është kthyer në një pazar, është pjesë e politikës dhe personalisht nuk më emocionon fare dhe nuk më josh për të bërë një këngë për atje.

Soni: Festivalin Evropian e ndjekim për të parë të rejat dhe e mbështesim Shqipërinë me këdo që të përfaqësohet, por pa entuziazëm. Nuk është më një ëndërr.

Ujë dhe sapun

Dashuri me notën 10

Cili është përkufizimi juaj për këngën?

F: Dashuri shumë e madhe.

S: Kënga është shpirt. Veçse dashuri është edhe energji shumë e madhe.

Cila është dashuria e parë?

F: Kënga

S: Padyshim kënga. Që e vogël këndoja "non stop".

Po më e madhja?

F: Kënga nuk të braktis kurrë. Sa herë që ulem në tastierë ajo është aty. Dhe ndonjëherë më vjen keq për të sepse unë e "shfrytëzoj". Por ka edhe një tjetër dashuri, po kaq e madhe dhe e ndryshme. Është dashuria për njeriun.

S: E njëjta

Ç'ju mallëngjen?

F: Më mallëngjen diçka që më mungon, diçka që është e bukur, që e kam dhe s'e kam. Më mallëngjen edhe stina. Stinët kur ndërrohen më japin një ndjesi… Nuk lidhen me kujtimet.

S: Më mallëngjen një situatë, një këngë, një njeri…

Ç'ju bën të qeshni?

S: Flori

F: (qesh)

Cili ka qenë momenti më i trishtuar në jetën tuaj?

F: Humbja e babait tim.

S: Nuk kam pasur situata shumë të trishtuara.

Cili ka qenë momenti më i lumtur?

F: Sot. Në këtë periudhë ndihem njeriu më i lumtur.

S: Unë dhe Flori ngjajmë shumë… Ka kohë që jam e lumtur dhe është në vazhdueshmëri. Janë gërshetuar bashkë dashuria, puna, jeta familjare, gjithçka.

Ç'fëmijë jeni për prindërit tuaj?

F: Mistrec.

Soni: Paksa i llastuar, por jo për keq. Një fëmijë që nuk ka sjellë probleme të mëdha. E mirë… Pak në botën time të muzikës.

Po si të dashur? (Ç'notë i jepni vetes)

F: Pyet Sonin. Notën 10.

S: Pyet Florin

Ç'ju pëlqen tek njëri-tjetri?

F: Më pëlqen dashuria për punën, emocioni për atë që kemi ëndërruar që kur kemi qenë të vegjël, më pëlqen sepse është shumë e kujdesshme. Është e mrekullueshme në raport me njerëzit. Është e matur, e komunikueshme. Por ajo që pëlqej më shumë është që ajo më dashuron shumë dhe unë gjithashtu.

S: E dua sepse më ka bërë njeriun më të lumtur në botë. Është dhurata më e bukur e jetës sime. E veçanta në çiftin tonë ëshë që e vlerësojmë dhe e respektojmë shumë njeri-tjetrin. Përveçse kemi shumë gjëra të përbashkëta, kemi shumë dialog dhe e duam njëri-tjetrin pa kufij.

Çfarë nuk pëlqeni tek njëri-tjetri?

S: Mua më pëlqejnë edhe defektet e Florit. (Ka shumë gjëra që nuk më pëlqejnë…) (qesh)

F: Janë gjëra fare të vogla, që mund t'i kemi patur që në fëmijëri. Fakti që jam me Sonin nuk është rastësisht. Kam gjetur atë që dua. E vlerësoj me notën 10.

Si e bëni gjumin?

F: Me sy mbyllur. Ëndërrat janë ekskluzivitet i Sonit, i sheh edhe me përkthim ndonjëherë, edhe me spote publicitare në mes (qesh).

S: Flori tallet me mua, se çohem në mëngjes e ia tregoj me hollësi. Ai më thotë TV "Ëndërra".

Ku besoni?

F: Më së shumti tek vetja, pastaj tek një fuqi e mbinatyrshme. E kam të vështirë t'i vë një emër. Dikush beson tek një fe, dikush tek një simbol. Kështu që s'mund të them që besoj tek feja, apo tek perëndia. Thjesht tek diçka e madhe, tek e cila kam nevojë të besoj. Por më shumë besoj tek vetja. Nëse i vë vetes një qëllim, e arrij.

S: Unë besoj shumë. Jam besimtare e krishterë, por besoj shumë edhe tek Flori.

Ç'prisni nga fundviti?

F: Pres të përmirësohet gjithçka që mendojmë në mëngjes dhe nuk funksionon. Shpresojmë që punën tonë ta shijojmë si artistët jashtë shtetit, (të paktën si ata në Maqedoni), ku gjërat shkojnë shumë mirë, sepse funksionon shteti, e drejta e autorit, gjithçka që ka lidhje me muzikën. Shpresoj të përmirësohet gjithçka që nga gjërat më të thjeshta, që nga uji e dritat, që nuk i kemi në mëngjes. Po më e rëndësishne është që të kemi shëndet dhe të jemi mirë familjarisht. Sa për njëri–tjetrin, edhe në një kasolle jemi rehat bashkë… (Shekulli)

Albanian Times: "Irsa Demneri, Miss Shqipëria 2007 - Miss Albania 2007

Nuk mjaftonte një kurorë e “Miss Tirana”, as ajo e “Rin Fest”. Pretendimet e 17-vjeçares nga Tirana ishin më të mëdha se kaq. Një konkurrim shtetëror do e plotësonte më shumë CV e modeles, apo vajzës që është mësuar tashmë me pasarelat, por edhe do ta lumturonte. Në fakt, tanimë është më shumë se e lumtur. Nga një konkurrim rrëmbeu tre çmime. Irsa Demneri, e shpallur mbrëmjen e së shtunës në kalanë e Elbasanit "Miss Shqipëria 2007", është njëkohësisht edhe fituese e "Miss Buzeqeshja" dhe "Miss Publiku".


Studion në vitin e tretë të shkollës "Sami Frashëri", dhe ëndrra e saj është ekonomiku. Një ekonomiste e zonja dhe një miss, nuk mund të kenë ndonjë tjetër lidhje për Demnerin, përveç një vajzë të kompletuar siç është ajo vetë. "Prirja ime më e madhe është matematika dhe për këtë shpresoj të bëhem ekonomiste e zonja këtu në Shqipëri, shprehet Demneri, ndonëse hobi ka pasarelat, ku dhe ka marrë pjesë si modele në shumë sfilata të realizuara këto kohë nga stilistët e njohur shqiptarë. Por Irsa nuk e sheh veten larg Shqipërisë. "Dua të studioj në Tiranë, më pëlqen të rri pranë njerëzve të mi, këtu ndjej më shumë ngrohtësi, më shumë vlerësim, të cilin nuk mund ta kem jashtë saj, dhe nuk mund të ma japë dikush tjetër", shton ajo.

Por si u bë pjesë e këtij evenimenti dhe si i priti tre çmimet? "Nga "Miss Tirana" kisha qejf të merrja pjesë në një garë më të rëndësishme se sa ai. Konkurrova, u përzgjodha mes 31 konkurrenteve dhe sot ndihem më e emocionuar se asnjëherë tjetër. Por e shtuna ka qenë një natë e paharrueshme dhe e bukur e jetës sime, ato emocione s’i kam ndjerë kurrë më parë. Nuk e prisja atë çmim dhe jo më tre çmime", tregon për gazetën 17-vjeçarja, e cila do të përfaqësojë kësisoj vitin e ardhshëm Shqipërinë në "Miss Globe".

Ndërsa tani mban mbi krye kurorën e më të bukurës, nga e ardhmja shpreson shkollën. Eshtë qëllimi i saj kryesor. "Pas missit, pres shkollën dhe kjo është gjëja e parë me më shumë vlerë për mua. Më pas gjërat në boten e spektaklit ia lë në dorë Zotit, çfarë të ketë rezervuar për mua le të më japë", shton bukuroshja, e cila më shumë se kaq e konsideron veten me fat. "Pasiguria ime për fitore ishte e barabartë me atë të vajzave të tjera. Edhe vetë regjisori Petri Bozo e ka thënë gjithmonë që nga dita e parë deri në ditën e fundit, nga 01-31 vajzat kanë qenë të barabarta. Dhe unë nuk e ndjeja veten fituese", thotë 17-vjeçarja Demneri, për të cilën brenda një nate kanë ndryshuar shumë gjëra.

"Dje isha një pjesëmarrëse në "Miss Shqipëria", tani mbaj kurorën dhe dy çmime të rëndësishme. Eshtë shumë ngritje përgjegjësie për mua", thotë ajo, teksa kujton urimin e parë që familja i ka dhënë, mbrëmjen e së shtunës në kalanë e Elbasanit."Urimin e parë e mora nga familja ime, nga stafi i gjithë i organizatorëve të këtij spektakli, nga kushërinjtë e mi që ndodheshin në spektakël, shoqëria dhe nga publiku. Ndërsa sot ka qenë një ditë me shumë telefonata, urime dhe gjithashtu më e veçantë ka qenë se kam marrë telefonata nga gazetarë për të dalë në kopertinat e revistave", tregon Irsa, vajza e vogël e familjes Demneri, e cila ka një baba inxhinier, një nënë mësuese dhe një motër katër vjet më të madhe. Eshtë lindur në 21 janar 1990.


E pare te “Miss Shqiperia”

“Miss Shqiperia 2007” eshte shpallur 17-vjecarja Irsa Demneri, e cila mban edhe kuroren e “Miss Tirana”. Spektakli qe mblodhi vajza nga e gjithe Shqiperia u organizua ne kalane “Real Skampis”, ne Elbasan.

I zhdukur nga qarkullimi prej kohesh, ish-misteri i pare shqiptar, Olti Xhezo, rishfaqet ne spektaklin konkurrent te “Miss dhe Mr. Albania”, ku ai ka fituar kurore si mashkulli me i bukur i Shqiperise. Por, duket se bukurine e Xhezos kohet e fundit kane fatin ta shijojne vetem te huajat, si nje italiane me te cilen ai kishte ardhur i shoqeruar per te pare “Miss Shqiperia”.

Vajza e deputetit te LSI-se, Nikollaq Neranxi, ka fituar cmimin “Miss Turizmi”. Tani, kur te dale te promovoje turizmin shqiptar ne bote, ka mundesi qe Kristina Neranxi te hedhe edhe nja dy fjale per frutat e thata qe tregton i ati.

Shume e kritikuam Maria Serifovic per fitoren ne “Eurovizion”. Madje e akuzuam se kendonte nje kenge te vjedhur nga ne (c’u be me ate histori valle?). Por ne fund te fundit, kengetarja serbe ishte e vetmja qe kendoi live ne skenen e “Miss Shqiperise”, ndersa te tjeret erdhen si zakonisht me CD-ne ne xhep.

Kortezi e Korrieri



Kalaja 2000-vjeçare kurorëzon më të bukurën e Shqipërisë

Spektakli është shfaqur drejtpërdrejt në valët e Televizionit “Vizion Plus”

Atmosfera e konkursit të bukurisë “Miss Shqipëria 2007” zhvilluar në Elbasan

Elis Memelli
Siç ndodh çdo vit në të njëjtën kohë, në muajin qershor është bërë dhe sivjet kurorëzimi i më të bukurës së vendit, “Miss Shqipëria 2007”. Dhe kjo nuk ndodh rastësisht, pasi gjithçka mbi organizimin dhe kohën e këtij organizimi është e përcaktuar me kujdes nga “Deliart Association”.

Kjo për të treguar korrektësi dhe seriozitet në kurorëzimin e më të bukurës së vendit. Dje në mbrëmje është zgjedhur “Miss Shqipëria” në një spektakël të mirorganizuar nga “Deliart Association”, në bashkëpunim me Televizionin “Vizion Plus”. Këtë radhë stacioni që do të përzgjedhë më të bukurën e Shqipërisë ka qenë qyteti i Elbasanit, me kalanë 2000-vjeçare. Një kala me një ndërtim romak, ngritur në fillim të shek. III Para Krishtit, si një kështjellë ushtarake për të siguruar kontrollin e rrugës “Egnatia”, në atë kohë një arterie e rëndësishme e Perandorisë Romake.

Skenografia e mrekullueshme ishte ideuar nga studio arkitekturore “Rebus”, së cilës pa dyshim nuk kishte si t’i mungonte një ndriçim perfekt i siguruar nga Fest Servis e mjeshtrit Lul Tusha. Prezantimi i spektaklit të bukurisë është bërë nga Alert Celoaliaj. Veshjet e vajzave ishin stiluar nga stilistja Ema Savahl (Koja), ndërsa koreografia u përgatit nga Kozeta Bakiu. Natyrisht që në gjithçka nuk mund të mos fshihej nga pas dora e mjeshtrit Petri Bozo, i cili asistohet nga Klara Bici dhe Egi, vajza e tij e vogël. Përzgjedhja e 30 bukurosheve nuk ka qenë aspak e lehtë, pasi ashtu siç tregon vetë regjisori Bozo, pjesëmarrja në seleksionimet ishte shumë e madhe.

Jo pak, por 260 vajza janë përpjekur të hyjnë në konkurrim për t’u shpallur “Miss Shqipëria”. Përveç prezantimit të bukurisë, vajzat i janë nënshtruar edhe testit të inteligjencës përgatitur nga organizatorët. Fillimisht ishin përzgjedhur 31 vajza, por njëra prej tyre u përjashtua nga spektakli dy ditë para zhvillimit të tij, sepse kishte thyer rregullat e vendosura nga organizatorët.

Gjeografia e vendeve nga kanë ardhur vajzat shtrihej që nga Tropoja, Kukësi, Laçi, Kruja, Gramshi, Përmeti deri te diaspora e Greqisë, Itali, SHBA, Gjakova, Prishtina dhe Mali i Zi. Spektakli live ka nisur mbrëmjen e djeshme në orën 21:00 dhe është transmetuar drejtpërdrejt ekskluzivisht nga Televizioni “Vizion Plus”.

Vajzat fillimisht kanë dalë në tri sfilata të ndryshme dhe më pas juria ka përzgjedhur 10 konkurrentet, të cilat vazhduan garën më tej për kurorëzimin e më të bukurës.
Juria përbëhej nga 12 anëtarë, ndërsa çmimet që janë dhënë krahas “Miss Shqipërisë” ishin shoqëruesja e parë dhe e dytë e missit, Miss Kinemaja, Miss Buzëqeshja, Miss Fotozhenia etj. Bukuroshet shqiptare që kanë fituar këto çmime do të marrin pjesë në një të ardhme jo të largët në konkurset ndërkombëtare të bukurisë që zhvillohen në Greqi, Çeki, Kinë etj.

Po kështu, për fitueset janë edhe dy bursa studimi në Universitetin Europian të Tiranës. Publiku, nga shtëpia, nëpërmjet televotimit ka zgjedhur një tjetër miss në këtë konkurs. Atmosferën e spektaklit e kanë ngrohur më tepër edhe performancat e këngëtarëve Aleksandër Gjoka, Arbërie Hadërgjonaj, Mira Bregu e Redon Makashi. Gjithashtu, baleti ka qenë një tjetër element që nuk mund t’i mungonte shfaqjes të zhvilluar në kalanë antike të Elbasanit.

(Albasoul)